संसारकै महँगो अन्त्येष्टि, ४७ जनाको अस्तु अन्तरिक्षमा सेलाइँदै

सबै मानिसको मृत्यु निश्चित छ । मृत्युपछि आफ्नो पार्थिव शरीरलाई कसरी अन्त्येष्टि गर्ने भन्ने विषयमा मानिसका अनेक खालका इच्छा हुन सक्दछन् ।

धर्म परम्परा अनुसार मृतकको अस्तुलाई नदीमा बगाउने वा कतै स्थापित वा विसर्जन गरेर मृतकप्रति श्रद्धाञ्जली अर्पण गर्ने चलन छ । कतिपय मानिसहरूमा यस्तो अनौठो इच्छा पनि हुनसक्दछन् कि आफू मरिसकेपछि आफ्नो शरीर तथा अस्तुलाई अन्तरिक्षमा विसर्जन गरियोस् ।

केही मानिसहरूले यस्तो इच्छा पनि जनाएका थिए कि मृत्युपछि भलै आफू यो दुनियाँबाट टाढा भइयोस् तर अन्तरिक्षमा सदैव चम्किरहियोस् । आफ्ना प्रियजनलाई विशेष प्रकारले बिदा गर्ने चाहना राख्ने मानिसहरू आफ्नो पार्थिव शरीरका अवशेषहरू अन्तरिक्षमा छाड्न चाहन्छन् । सोही इच्छा पूरा गर्नका लागि एउटा अन्तरिक्ष कम्पनी सेलेस्टिसले तयारी सुरु गरेको छ । उक्त कम्पनीले विभिन्न पाँच देशका ४७ जना व्यक्तिहरूको अवशेषलाई अन्तरिक्षमा विसर्जन गर्नेछ ।

उक्त कम्पनीले मृतकका अस्तुहरूलाई दूरसञ्चार उपग्रहहरुसँग जोडिरहेको छ, जुन फ्लोरिडाको एक अन्तरिक्ष केन्द्रबाट प्रक्षेपण हुनेछ । उक्त स्याटेलाइटले करिब एक दशकसम्म पृथ्वीको परिक्रमा गर्नेछ ।

सेलेस्टिसले उक्त स्याटेलाइटको लाइभ जीपीएस डाटा उपलब्ध गराउनेछ जसबाट मानिसहरूले आफ्ना मृतक प्रियजनको अवशेष अन्तरिक्षमा कहाँ छ भन्ने कुरा ट्रयाक गर्न सक्दछन् ।

स्याटेलाइट निस्क्रिय भएसँगै उक्त अवशेष स्याटेलाइट सँगै रहनेछ । स्याटेलाइट निस्क्रिय भएर पृथ्वीको वायुमण्डलमा प्रवेश गरेसँगै अवशेष र स्याटेलाइट समेत वातावरणमा दहन भएर विलिन हुनेछन् ।

यही हप्ता हुने प्रक्षेपण अगाडि सेलेस्टिसले एक असामान्य अन्तिम संस्कारका लागि एक कार्यक्रम आयोजना गरिरहेको छ । यो तीन दिनको एक कार्यक्रम हुनेछ जसमा संसारभरका १ सय ६० जना पाहुनाहरु सामेल हुनेछन् र प्रक्षेपणसम्मै रहनेछन् ।

अन्तिम संस्कारको अवशेषमा मार्जोरी डफटनको अवशेष पनि सामेल छ जसले १९५० को दशकको अन्त तथा १९६६० को दशकको सुरुआतमा नासाको पहिलो महिला मंगल मिसनको चालक दलको सदस्य बन्नका लागि तालिम लिएकी थिइन् ।

सन् २०२० मा उनको मृत्यु भएको थियो । सन् १९६२ मा मर्करी मिसन बन्द भएसँगै डफटन कहिल्यै पनि अन्तरिक्षमा जान पाइनन् । अब उनका पुत्र माइकल डफटन आमाको इच्छा पूरा गर्नका लागि उनका अवशेषहरूलाई अन्तरीक्षमा पठाउँदैछन् ।

अबको १० वर्षपछि जब स्याटेलाईट पृथ्वीको वायुमण्डलमा फिर्ता आएर दहन हुनेछ तब बाँकी सबै अवशेषसँगै आफ्नी आमा पनि एउटा तारामा परिणत हुने माइकलको विश्वास छ ।

स्मरण रहोस् सेलेस्टिसले यसअघि सन् २०१२ मा पनि ३२० जना मृतकको अवशेष अन्तरिक्षमा विसर्जन गरेको थियो ।