‘वर एण्ड वधु’को बाँकी छायांकन नेपालमा
रंग नेपाल
२०८० चैत १३ मा प्रकाशित
काठमाडौं । रोमानियामा ५० प्रतिशत छायांकन सकिएपछि रोकिएको फिल्म ‘वर एण्ड वधु’को बाँकी काम अघि बढ्ने भएको छ ।
फिल्मका निर्देशक मिलन चाम्सका अनुसार बाँकी ५० प्रतिशत छायांकनको काम नेपालमा पूरा गरिनेछ ।
रोमान्टिक कमेडी कथामा तयार भइरहेको फिल्मको बाँकी काम चैतको तेस्रो साताबाट सुरु हुनेछ ।
फिल्ममा नवनायक विवेक कर्माचार्यले ‘वर’ र अभिनेत्री आँचल शर्माले ‘वधु’को भूमिका निभाउँदैछिन् ।
अभिनेता विवेकले दोस्रो सेड्यूलका लागि आफ्नो शरीर सुगठित बनाएका छन् । निर्देशक चाम्सले कथाको माग अनुसार नै विवेकले शरीर बनाएको बताए ।
उनले फिल्मले विवाहको संस्कृति कथालाई देखाउने बताए ।
डाक्टर अमित रिजाल कार्यकारी निर्माता रहेको फिल्म एलआरके इन्टरटेन्मेन्टको ब्यानरमा निर्माण भएको हो । फिल्ममा सुदीप बरालको छायांकन छ ।
