सिंघम अगेनमा विक्कीको प्रवेश
रंग नेपाल
२०८० जेठ ३ मा प्रकाशित
मुम्बई। बलिउडमा वाईआरएफ स्पाई युनिभर्सपछि निर्देशक रोहित सेठ्ठीको कप युनिभर्स प्रतिक्षित फिल्म निर्माणमा अग्रस्थानमा पर्छ । कप युनिभर्सले अजय देवगनलाई लिएर ‘सिंघम’, ‘रणवीर सिंहलाई लिएर ‘सिम्बा’ र अक्षय कुमारलाई लिएर ‘सूर्यवंशी’ निर्माण गरिसकेको छ ।
निर्देशक रोहित यतिबेला ‘सिंघम अगेन’को तयारीमा छन् । फिल्म ‘सर्कस’को प्रमोसनका समयमा उनले अभिनेत्री दीपिका पादुकोण नयाँ कप युनिर्भसको चरित्रमा देखिने खुलासा गरेका थिए । अब यो फिल्ममा ‘उरी’ अभिनेता विक्की कौशल पनि जोडिने भएका छन् । विक्कीलाई फिल्ममा लिने विषयमा रोहितसँग छलफल भइसकेको छ ।
निर्देशक रोहित विक्कीलाई दिइने चरित्रका बारेमा योजना बनाइरहेका छन् । स्रोतका अनुसार रणवीरको भन्दा विक्कीको कप चरित्र फरक हुनेछ । ‘रोहित विक्कीको हिरोइक चरित्रलाई नयाँ फिल्ममा देखाउन चाहन्छन्’, स्रोतले भन्यो ।
रोहित र विक्की तीन वर्षयता नयाँ फिल्मका लागि छलफलमा छन् । उनीहरुको छलफलले यो वर्ष पूर्णता पाउनेमा दुवै ढुक्क छन् । अहिले रोहित फिल्मको स्क्रिप्टको काम गरिरहेका छन् । ‘सिंघम अगेन’मा अजय देवगन, करिना कपुर, रणवीर सिंह, अक्षय कुमार र दीपिका पादुकोणको पनि अभिनय रहनेछ ।
