चलचित्र ‘बाटो : रोड टु डेथ’ को ट्रेलर सार्वजनिक
रंग नेपाल
२०८० वैशाख १६ मा प्रकाशित
काठमाडौंं । साउथ इन्डियन (दक्षिण भारतीय) शैलीमै साउथकै टीमबाट निर्माण भएको नेपाली रोड थ्रिलर चलचित्र ‘बाटो : रोड टु डेथ’ को ट्रेलर सार्वजनिक भएको छ ।
केही समय अगाडि सार्वजनिक चलचित्रको फर्ष्टलुकको चर्चापछि निर्माण युनिटले शुक्रबार ट्रेलर ल्याएको हो । ट्रेलरमा साइकोटिक कल्ट ग्याङलाई भयानक खलनायकको रुपमा देखाइएको छ । ट्रेलरमा फिल्म भित्रको कथा भने केही पनि खुलाइएको छैन ।
काठमाडौं फिल्मस् प्रालिको ब्यानरमा निर्माण भएको चलचित्रका लेखक तथा निर्देशक मदन थापा र छायाँकार शरण ऋषि हुन् । निर्देशक थापा तथा छायाँकार ऋषि भारतको चेन्नइ चलचित्र उद्योगमा चर्चित व्यक्तित्व हुन् । भारतको चेन्नाइमा उत्कृष्ट प्राबिधिक कार्य भइरहेको चलचित्र नेपाली, अंग्रेजी, तमिल र हिन्दी गरेर छुट्टाछुट्टै ४ भाषामा तयार गरिएको छ ।
चलचित्रमा मिथिला शर्मा, रक्षा थापा, सुलक्क्षण भारती, उत्पल झा, विजय ताम्राकार लगायतको मुख्य भूमिका देख्न सकिन्छ । फिल्मका निर्माता चन्दन झा हुन् । निर्माता झा काठमाडौं फिल्मका फाउन्डर समेत हुन् ।
काठमाडौंका विभिन्न स्थानको अलवा उदयपुरको गाइघाटमा छायाँकन भएको फिल्मको रिलिज मिति अहिले सार्वजनिक गरिएको छैन । चलचित्रको अब आउने दोस्रो ट्रेलरमा रिलिज मिति खुलाइने निर्माता चन्दन झाले बताए । चलचित्र डब्बी एटमस साउन्डमा तयार हुनेछ । डब्बी एटमस साउन्ड सिष्टममा नेपालमा पहिलो पटक चलचित्र तयार हुन लागेको हो ।
