कविता : आफ्नो घर जलाएपछि हुँदैन खरानीको कमी
रंग नेपाल
२०७९ फागुन ६ मा प्रकाशित
मेघराज भट्टराई
हिजो आज यो समाज अस्थिर अराजक भयो
कर्तव्य विमुख नीति नैतिकताबिहीन बन्दै गयो ।
विश्वास कसको गर्ने देशको कार्यकारी प्रमुख
पिँध नभएको लोटा जस्तो अस्थिर उद्दण्ड भयो ।
सपना पनि कस्ता–कस्ता झूठा छलकपट मात्र
जनजीवन पेशा व्यवसाय पानीको फोका भयो ।
आफ्नो घर जलाएपछि हुँदैन खरानीको कमी
विदेशीको दलाली गर्दा गर्दा सार्वभौमिकता गुम्यो ।
चिहानबाट मुर्दाले टाउको उठाउँदै भन्छ लूट्ने
फेरि राजा या प्रजा नागरिक नबन्ने नै भयो ।
दुश्मनको त काम नै हो आफ्नो स्वार्थ पूरा गर्ने
दुश्मनसँग मिलेपछि भाई कमजोर हुने नै भयो ।
