सुरू भयो इन्द्रजात्रा

काठमाडौं । वसन्तपुरमा आइतबार बिहान इन्द्रध्वजा ठड्याएसँगै काठमाडौं उपत्यकामा मनाइने इन्द्रजात्रा सुरू भएको छ ।

बिहान ८ बजेर २६ मिनेटको साइतमा इन्द्रध्वजा उत्थान गर्दै यसवर्षको इन्द्रजात्रा आजदेखि सुरू भएको हो । हनुमानढोका दरबार अगाडि इन्द्रध्वजा ठड्याएपछि औपचारिक रूपमा इन्द्रजात्रा सुरू हुने परम्परा छ । हरेक वर्ष भदौ शुक्ल द्वादशीका दिनदेखि एक हप्तासम्म मनाइने येँया भनिने इन्द्रजात्रा आउँदो असोज ५ गतेसम्म चल्नेछ ।

यस्तै, असोज १ गते मंगबार कुमारी रथ यात्रा प्रारम्भ हुनेछ । असोज २ गते बुधबार माथिल्लो टोलमा रथ यात्रा हुन्छ । असोज ५ गते शनिबार नानिचा यात्रा हुन्छ । त्यसै दिन राति १० बजेर ३१ मिनेटको साइतमा इन्द्रध्वज ढालेपछि जात्राका कार्यक्रम सकिन्छन् ।

कुमारी इन्द्रजात्राको अवसरमा पर्सि असोज १ गते काठमाडौं उपत्यकामा सार्वजनिक बिदा रहेको छ ।

आजैदेखि इन्द्रजात्रामा प्रदर्शन गरिने मजिपाः लाखे, हल्चोकको आकाश भैरव, किलागलको पुलुकिसि, देवी नाच, महाकाली नाच, आकाश भैरव, समयबजी सजाएर राख्ने लगायतका परम्परागत सांस्कृतिक मूर्ति, नाचलगायतका धार्मिक गतिविधि हुने गर्दछन् ।

सम्बन्धित समाचार

‘ए मेरो परदेशी’ सार्वजनिक

बुढानीलकण्ठमा ‘दी कफी क्लब’ 

अन्तर्राष्ट्रिय बजारमा पनि तहल्का पिट्दै चलचित्र ‘पूर्णबहादुरको सारङ्गी’

‘मिसिङः केटी हराएको सूचना’को गीत ‘सपनीमा’को छायांकन