चलचित्र ‘फिरफिरे फिरिरी’को ट्रेलर सार्वजनिक
रंग नेपाल
२०८१ पुष २४ मा प्रकाशित
काठमाडौं । नेपाली चलचित्र ‘फिरफिरे फिरिरी’को अफिसियल ट्रेलर सार्वजनिक भएको छ । माघ ४ गतेबाट प्रदर्शनमा आउन लागेको चलचित्र ‘फिरफिरे फिरिरी’को सोमबार निर्माण पक्षले एक विशेष समारोहकाबीच अफिसियल ट्रेलर सार्वजनिक गरेको हो ।
ट्रेलर सार्वजनिक गर्दै निर्देशक नबिन भट्टले यो हरर–कमेडी फिल्म भएको बताए । उनले नेपालमा विरलै प्रयोग भएको जनरा हरर, कमेडी फिल्म भएको बताए ।
उनले भने, ‘नेपालमा विरलै प्रयोग भएको जनरा हो, हरर कमेडी । बलिउडमा यो जनरा सर्वाधिक सफल देखिए पनि नेपालमा प्रायः हरर वा कमेडी कथामा मात्र फिल्म बनेका छन् । ‘फिरफिरे फिरिरी’ भने हरर कमेडी हो । अर्थात् फिल्मले हँसाउने र तर्साउने दुवै उद्देश्य बोकेको छ ।’
भट्टको निर्देशनमा तयार भएको फिल्मबाट सन्दीप श्रेष्ठ र भावना उप्रेतीले डेब्यु गरेका छन् भने रविना केसी, पिटर प्रिन्स, मनोज कुमार अधिकारी, शंकर सेढाई, सूर्यमान लिम्बू, पुष्प अवस्थी लगायतको पनि अभिनय छ । निर्देशक भट्ट र सन्दीप श्रेष्ठले फिल्मको स्क्रिप्ट तयार पारेका हुन् ।
